1. Ketut yadi tidong bangun, ke mepayas, wastra yadi kembang bukit, nemesinjang ngapitolah halus, sinjang ngapitolah halus, pepeke sutra jenar, anteng dane geringsing, geringsing wayang, pantes iringang lelenjar, pemargine sada lenjar, yadi lentar-lenter , tangkise murub gamelan, gending yadi gending napi, tanjekin dane, gending yadi tabuh pitu, gending subandar sesawitan, yadi ngolas raras, tangkise mepasang guna, guna yadi guna napi, pasangang dane, guna yadi sekar pullet, mapulalat mapulilit, buka kena guna di rujak gadung, ditu tandake mekerug. …… 3x.
2. Ketut bangun suba lemah, suba lemah galang kangin, raris ida kayeh mesiram, usan mesiram ngalap sekar, sekar emas tatunjungan, sekarang ida mesolah tengahing natah, manyuregseg ida manyulempoh, menanjek mangicen sekar, dong icenin jero kidunge, parekan kayun manunas, raris ida mengenjuhang sekar.
3. Ketut bangun suba lemah mamutput sekar, sekare ke taman sari, sekar sandat menuh gambir, manuh gambir macegcegan, anggen ida memmayasin kasur, kasur bale, bale meundag bandung sari, pamereman ayu dedari, mapipelok mapirade, malulangse-malulangse, maleluhur, ider-ider permas wilis, ngendih murub nyarendepang, masunaran, ade genah dedari mingraos, mingraosang ngempol sekar, sekara gambir anggen ida mauruk legong, manglegong ditaman sari, gegamelan aduh dewa kakempulan, gagupekan sekar sandat gadung melati, munyin suling e mangelur, wangenonton-wangenonton sayan prapta, amnonton solah dedari, dedarine tamurun mepasang guna, guna duyung wewadonan, dane lali mengalahin mulih, boya meling-boya meling teken karya, kena guna ya dijaring sutra, gunan sanghyang aduh dewa nyarusupang.
4. Ketut bangun, suba lemah galang kangin, padingehang munyin sulinge di jaba, buka kenken munyin sulinge di jaba, kakrecingan gagupekan sekar gadung, makriyot munyin korine di jaba, kaden aru icing I nyen, I ketut manampa odak, odak napi tampan dane I gusti, odak wilis meratus cendana jenggi, buka kenken tandang dane mangodakin, minggek aru minggek mingser, matanjek makejit gincang, kema jemak kekantonge melu kangin, icing aru ngancang luas, ka pandeng ngalebur bungkung, bungkung napi lebur dane I gusti, bungkung pendok jambot udang bakat manuduk, ya dijaha duduk dane I gusti, sedek aru ngancan luas ke taman manuduk sekar, sekar napi tandur dane antuk I gusti, sekar tunjung telaga apit pancoran, apang ada anggon mulan purnama, kakelangan di cokoreiding bungkung.
5. Dedari nyoman buka gelatike dadua, ya maiber menek keceg tahun, malinggih dibale danta, ya di bale danta, di tengah bale ne alit, jalan dedari mingraos mingraosang ngempol sekar, ya di sekar tunjung, cenik grencing aduh mirah ulung, ulung kuda dewa ulung, teked beten ada ngaras, ya I nyen mangaras, hyang dedara hyang dedari, dedarane Bagus menuh Made lunga ke taman,yak e taman sari, tetanduran ya di sarwa sekar, ya di sekar tunjung, da ngalap-ngalap tunjunge, tunjunge kekeran dewa, aduh dewa ayu, nguda sangkan mbok Made mula, tidoang bangun ke masolah, ingetin igele dewa, dedari Nyoman, buka don dapdape ulung, layak-layak putih kuning, makedep marupa dewa.
6. Pang pung pang capung gadang dadi kuning, ya makebur, ya maiber naru manganginang, mangungsi ka gunung sari, ka gunung sari, ya matulak yak e jero puri, dapetang Ida menangis, Ida menangis ya ilang kalicapung emas, palaliayan Ayu dedari, Ayu dedari, pawongan sami ngulati sami ngulati saruang nuduk ya di sekar tunjung menuh gambir macegcegan, macegcegan angen Ida mamayasin kasur, kasur sari galeng tumpuk, galeng tumpang mangasurin ya di bale anyar, kori danta maukiran, maukiran menek tuun di pasarean.
7. Pudak sari maoran saksak, malelenter gadung sandate dinubah ginempal gambir, ginanggit, gambir ginanggit, sekarang bagus dedara, Ida disanga bagus, Ida pacing karma, mangungsi ka gunung sari, ka gunung sari, margi ida manganginang, sing jalan malungguh, sing jalan malinggih, malinggih diduur batu, tuun ya manempal sila, menagntuk mangrasa sedih, ngrasa sedih bengong mapangenan, kaliwitan linglung, aduh kenapa baya sing ninggal ayu dedari, ayu dedari uyang mahayingan, buka lengah gadung, uyang mamulisah, nuka kena mantran sandi, mantran bagus dedara, kadung manyusup malilit.
8. Krencang-krencing, kagelane kutang, wang jerone pupu, pupu-pupu duwang, tong kena ajak mesanding, sanding-sanding, rorodang kebun ira, rorodang ke gunung, ya ke gunung sibetan, ke tenganan ngalih geringsing, ngalih geringsing, ngojog naru di duluan, marerebong saput, madingding kelabang, ngingeting guruan nyai, guruan nyai, nagih bungkung timah, nagih bungkung tiuk, nagih bungkung pendok socan nyane piling-piling, piling-piling, tingahin krepuak, kecegin kecentrung, tinggahinye guak, teka sikep manyanderin, lilitin bebingkal, bebingkal mabulu, mabulu asibak, ne asibak caplok bangkung, anggut kaung, pocol narune durinan, bengong ne dimalu, bengoong mepangenan, manyentrod mangicen sekar.
9. Sekar sandat gadung melati, malilit di ampel gading, tempur angin soyor-soyor, soyorin jero kidunge, dane karsa ngendon joged, solah jogede cara gianyar, gegamelan tabuh apisan, majegog magender gender calung, lirmajiwa tetahan batun timun, timun semangka, kenying-kenying masisig dadua masuluh di sember yeh ening, bajang-bajang juru kidunge, papatuhan maudeng batik betawi, raris ida ngambil sekar, sentrodin juru kidunge, raris ida ngenjohang sekar, sekar sanddat miyik nyangluh.
10. Anggek dane ring lawangan, manyingak sekare rawit, arimawa apang tegeh ya mangayor, mangungkulin kori agung, tempur angin yan empakange soyor, soyorin jero kidunge, manyuregseg ida manyulempoh, metanjek mangicen sekar, dong icenin juru kidunge, sekare panedeng kembang.
11. Ayu tangi ya mangujang cang-cang beli tiang, tiang luas ngendon joged, suling pat-pat ya merebab rebab dadua, suaran gender ngarerengi, dong keberang oncere solahe merak metandang, dane makta kepet cina mapirada, mapidan manuk dewata, manyuregseg ida manyulempoh, metanjek mangicen sekar, dong icenin juru kidunge, ne magonjer paicayang.
12. Putri alit mangujang ya mngoyong ditu, margi kayeh ngaja kanginang, marerodan ajak……, papatuhan nyangkil jun, tayungane ya membat-membat miring, tan pendah busung amputang, manyuregseg ida manyulempoh, metanjek mangicen sekar, dong icenin juru kidunge, parekan kayun manunas.
13. Aruh ya sekar sandat, dikembange tanpa guna, dilayune kasub mayang, miyik nyangluh nene kuning mahimpugan, pantes pejang di pamereman, malih di pamereman ayu dedari, bale emas maukiran, mapirada ya ngendih-ngendih murub, tembok mirahe ngelencok, genah dedari mingraos, mingraosang gempol sekar, sekar tunjung rawit goba tanpa guna, padma bang lan tunjung dadu, di tengah telagane, bale alit sendin ipun maukiran, bebataran batu putih tembok selaka, ayu dedari lali-lali kabencingah, mareren beten tamane, magunem ngempol sekar, sekar jepun anggitang benori putih, cempakane ngalik-ngalik dipunyanye, jujuh-jujuh sayan joh, rasanye buka bungayang, dumadak si ya ulung jani, ya meniben tiang.
14. Jepun gadang, malengkung dewa malengkung, bancang ramping minugelang, jarijine lurus pangancan, rurus pasri, roma samah tagel pindo, sunggar danta pontang lima, masuri mangawe payas, payas pasri, buka tuara da mamandung, malengkara rarase kendran, masuri masaludira, ujan angin toya mumbul pasiraman, nedeng purnamaning kapat, mengayun gelunge dewa, dewa ayu lali-lali ka bencingah, karsan dane nepak gender, saurin kidung kakawin.
15. Sempol ngude ngeling ditu, aruh meme aruh bapa juang tiang, kujang meme nyuang nyai ditu, nyai Ketut jegeg tatagonang anake agung, makletig munyin bedil uli kangin, sambeh buyar atin meme merasa takut, ya ke jaha lakun meme ya makelid, naru Badung Tabanan tuak ilang tabu liu, teka parekan cenik uli kangin, natad jaran makta surat pangerum-rum, rumrum-rumrum asih-asih, krincing naru gelang kuning, magledag pipise liu.
16. Sekar agung ratna putih, mangeropyok, ditaman sari, ne ngarembun di Sanggalangit, saksak emas sarunian, rijasane apang tegeh ya mangayor, mangungkulin kori agung, tempur angin soyor-soyor, soyorin jero kidunge, lamun wenang ayu dedari, dedarine pasulegseg, masolah mangambil sekar, manyuregseg ida manyulempoh, metanjek mangicen sekar, dong icenin juru kidunge, ne magonjer paicayang.
17. Jagung-jagung siksik kalesik, masekar maikuh landak, mabuah manyabit patpat, jambot nyane mamulun cemara, isin nyane mara mataluh kakul, aba kamel aba mulih, alihang uyah sera tabia, mangeberber ida majejongkong, ilih-ilih menambus jagung, tiang ngidih apang ada jagung.
18. Sekar emas gambir, raris ida lunga ke kahyangan, karsan ida bagus dedara, ya dedari ida ngambil tirta, pelapahe sekar tunjung, tunjung abang tunjung kuning, sekarang ida masolah, masolahang tengahing natah, manyuregseg ida manyulempoh, metanjek mangicen sekar, makepet cina matulis, ida nyelang ka pemerajan, I lanang bagus dedara, ayu dedari ida mengicen sekar, sekar sandat miyik nyangluh.
19. Ereg-ereg rumbin, ya tragtaginye kori, galenginye pudak, galenginye pudak, olesin bahan geringsing wayang, uyang aying ayung, I jurang makasur sari, melat melot, ya I lanang bagus made, ereg-ereg rumbin, nyuleleg di beten bingin, ada taruna bagus, ada daha montok, ento nyandang tohin mati, eda nyulelegin, eda nempuh papingitan, papingitan I ketut penganten anyar, ya adem kutang, dudukang I ketut, bahang buah, bahang base, I ketut tuara nyak.
20. Ngelod ganginang mangelod ganginang, meru emas matumpang sang likur, jalan dedari memarek, memarek bagus dedara, ida lunga ka payudhan, mirage orti saking Jengalane ngempur, tumuli raris mangambyar, nyungkilit keris tetahanan tan urungan, margi hunus ke kerise, margi amuk kawula badunge rauh, suaran bedile marempyang, tetaneman kawula badunge luhung, sunggap uli getok-getokan, jempana luhung apitang pangkung, dayanin dewa dayanin, belumbang dalem maisi belatung.
21. Copok ental garingsingan, daging ipun lontar maukir, tundak dane mapulas ijo, paletinge ne mapotang selaka menuh, krenyeb-krenyeb di keropakan, tiyuk angrise luung paneresan, saput sutra, mara tuhun uli di patununan, mangorahang bancang nyane sakit, pemargine riya-riyo, ka pawon labuh ping telu, pating sungkal pati sungkil, mangungkabin payuk jakan, raris dane ka jabayan, ngeskes entip tangane manampa uyah, margi layarang perahu kapale tiang duang, macang-cang dewa macang-cang, macang-cang di pelabuhan.
22. Embok nyoman tumben tepuk mara jani, ngundap nguyuk di bencingah, jalan mulih dong enjitang beli roko, roko napi rokon beli ya beli made, roko makulit jagung mapilpil ya matali-tali, di napine rokon beli yadi beli made, di dulun dinding mwadah copok mapirada, galar membat reke gusti, yadi galar membat, likah elung encet-encetang lemet melengkung, daja ngenjek reke gusti tanahe belek, mapulpulan odak cokor ayu dedari, ayu dedari ida lunga ngduluang ngendonang sahur, sahur napi endohang dane antuk I gusti, sahur once gadung-gadung melati, mula saja putrine uli di lembu, papag joli pajeng pagut makembaran.
23. Ukir kawi ya maukir kawi, undage saking gegelang, druwen ida bagus dedara made, dane karsa nyeneng sekar, sekar emas tunjung kuning, sekarang ida masolah, baris kepet makembaran, maonggar-onggar cempaka petak, minggek-minggek mahoncedan, nolih-nolih nanjekin kempul, kempul emas paturunan Bhatara Kawi, matrompong magender-gender calung, sasulingan cara wong Siak, urukan-urakan wong Inggris, bajang cerik praginane bagus anom, maudeng batik mapilpil, manyobet sutra mawarna, nyungkilit keris tetahanan, dedanganan dane luhung, wenang saje wong lemahe mebalih sanghyang, bale alit palinggihan mabundera sutra kuning.
24. Benjang rahina, pasemengan kayeh kangin, marerodan jak dadua, papatuhan nyangkil jun tayungane sada nyudeplak, pati kenyir, babokongan magelohan, ada teruna di banjar, tangkejut malaib mulih, meme bapa padikang tiang ento, selem sedeng makenyur-kenyur, kujang meme madikang ento, ya I nagasari, tulus cai maselselan, empak ya di carang kayu, paci-paci pahit malilit, meme bapa jalan luas, ngaduluang luas ka gunung, nyaruang nelokin bapa, tuara kapanggih, liking pakune mangambyar, jemak sangkange di Bali, niki surat uli di Jawa, surat pangerum-rum, belu Rudanti melaku daya, ngajakin luas merangkat, lamun desane mangundur.
25. Bale bandung matugeh matadah paksi, paksin ida paksi maukir, pakaryan saking gegelang, saking gegelang tulis ipun megambar-gambaran, kori agung mapirada bale emas makejang-kejang, makejang-kejang undag ipun ma eluk sanga likur, pamargine ngelod ganginang, Ida lunga ke joh gatra, ke joh gatra kaundang mayasin rejang, rejang ke tiga pasayasin ida, ne memarak dedari nyoman, dedari nyoman parekan terbang-terbang mebalih, nempal sila ngabih keris, matur sembah manyiwi bhakti, manyiwi bhakti, dane sede-sede awake, awak gepe ngitan dalem, okan ratu sadi tawang, sadi tawang, wang tumagel, wang tuminggel, manyuregseg ida manyulempoh, matanjek mangicen sekar…..3x
26. Ayu ketut terini, merika ambil ke canange, parekan kayun manunas, ya kisel-kisel matanjek mabuluh angsul, ya bancang dane ramping tetagelan nampih pala, ya jerijin dane lurus tangane lemet melengkung, ya rauh dane gayal-gayal manyentrodin. Ayu ketut terini meriki bakta ka canange parekan kayun manunas, ya kindreng-kindreng mamandreng teruna bagus, dane kedek dane kenyung lagute nyanding kagelan, kagelane putih montok mesawang bunga piroras, ya rauh dane gayal-gayal manyentrodin.
(Sesangananne, sajeng rentenge, cecepanne)